مغترب زهجان

بسم الله الرحمن الرحيم
من حكاوي السياسة
مغترب زهجان
صديقي الحلفاوي مهندس ميكانيكي إغترب في المملكة السعودية لأكثر من ثلاثين عام . اليومين الماضيين شرفنا في عطبرة ورافقته في رحلة عمل ،ولأني حريص أن لا أخلط السياسة بعملي الخاص طلبت منه أن ينزلني من عربته عند رأس الشارع ،تركني وانصرف على وعد أن نلتقي في ذات المكان بعد ساعة .ولكن عطبرة ضيقة!! فوجئت به يدخل على  في دار المؤتمر الشعبي  ،وقبل أن أسأله ضحك قائلا مالك السياسة ؟ وبلهجة حلفاوية ( ياخي ده وجع رأس ساكت ) واستمر ناصحا لي خليك في شغلك وريح بالك السياسيين ديل غير منطقيين استمر يحكي لي .يقول : ذات مرة استقبلت أحد المعارف في جده ومعه والدته بعد فراغه من أداء فريضة الحج .فقد أصر على زيارة عمه الذي مكث لثلاثين عاما دون أن ينزل السودان وسيجتهد معه لإقناعه بالعودة فترك أمه وذهب اليه ،وعندما رجع الي وجدته شديد الغضب فأشفقت عليه وقلت ليهو القصة شنو ،قال عمو زعلو زعل شديد قال يأخي عمي له ثلاثين سنة. ما شاف البلد يسب في البشير ويشتم الحكومة .وهو قاعد في السعودية مالوا ومال المؤتمر الوطني !! يا أخي كان داير يعارض اليتكلم في الملك هسة الإنقاذ عملت ليهو شنو وهو خرج في حكومة الصادق . وقبل أن أعلق على القصة قال خليك من بتاع السعودية مرة مشيت هولندا بعد نزلت الشقة الشلة قالوا اليوم عندهم ندوة سياسية في مركز قريب تمشي معانا . قلت يا خي خلوني هنا جيبو شراب وخواجية اتونس معاها وانتو امشوا ندوتكم ،المهم الجماعة اصروا مشيت معاهم الولد البقدم المحاضرة شعره  نازل تحت أكتافو ويتكلم عن شارع التحدي قال شارع ضيق وما مطابق للمواصفات وكتل ناس كتيرة بالحوادث المرورية .قال لي أنا ما صبرت يكمل باقي كلامه  طوالي رفعت يدي واستلمت المايك وسألتو إنت من وين ؟ من الجزيرة الحصاحيصا .طيب زرت عطبرة قبل كده ؟ لا .. آخر مرة مشيت السودان متين ؟ قبل خمستاشر سنة  . قبلت على الحضور وقلت والله أنا ما سياسي ولا بحب السياسة لا معارضة ولا بحب الحكومة لكن انتم ما شفتونا لمن كنا نبيت في موقف الخرطوم في عطبرة عشان نركب اللواري. و بعد اتحسن الوضع شوية جات النيسانات بقينا نقوم الفجر عشان نصل الضهر الخرطوم . بعد شارع التحدي الضيق ده ناس عطبرة يمشوا الخرطوم ويجوا في نفس اليوم والسعودية البتقول شوارعها واسعة ماكانت ضيقة لحدي ما ربنا فتحها عليهم والحوادث الكتلت الناس  الطيارة  من السما تقع والناس يموتوا .
غايتو أصحابي زعلوا وقالوا أحرجتهم شديد .
قلت ليهو خليهم ناس المعارضة في واحد اغترب بفيزة مرافق ليهو سبعة سنة وموكل مع زملانوا الصحفيين محامي مشتكين الحزب قالوا دايرين حقوق عملهم في صحيفة  رأي الشعب وكل يوم يكتب مقال في الشعبي والحوار  وهو مشتكي الشعبي وما حضر الحوار .
احسن من وجع القلب ده خلينا في شغلنا .
اسماعيل فرج الله
15 نوفمبر 2016